اسلام آباد – 21 – آڪٽوبر (اي پي پي) اطلاعات ۽ نشريات واري وفاقي وزير مريم اورنگزيب فيٽف جي گري لسٽ مان پاڪستان جي نڪرڻ تي عوام ۽ اتحادي پارٽين کي مبارڪباد ڏيندي چيو آهي ته اڄ پاڪستان کي ٻه خوشخبريون گڏ مليون آهن، اڳ ۾ نواز شريف جي حڪومت، هاڻي شهباز شريف جي اتحادي حڪومت جي محنت سان پاڪستان فيٽف جي گري لسٽ مان نڪري ويو آهي، الحمدالله. پنهنجي هڪ ٽوئيٽ ۾ هن چيو ته مسلم ليگ (ن) اڳ ۾ به ملڪ کي فيٽف مان ڪڍيو هو، اڄ ٻيهر پاڪستان کي عزت ملي، اتحادي حڪومت ۾ شامل سڀ پارٽيون ۽ اڳواڻ مبارڪباد جا مستحق آهن. هن چيو ته مخالف ڌر ۾ هجون يا حڪومت اتحادي پارٽين جي ترجيح پاڪستان جو مفاد ۽ عزت رهي آهي. وزيراعظم شهباز شريف، پرڏيهي وزير بلاول ڀٽو زرداري خاص طور تي مبارڪباد جا مستحق آهن، ڇهن مهينن ۾ اهو ڪم ٿي ويو جيڪو گذريل چار سال ۾ نه ٿي سگهيو. هن ادارن، وزارتن جي لاڳاپيل عملدارن کي خراج تحسين پيش ڪندي چيو ته انهن جي مسلسل محنت جو ثمر اڄ جي ڪاميابي جي صورت ۾ قوم کي مليو آهي.
