بغداد – 06 – جون (اي پي پي) پرڏيهي وزير بلاول ڀٽو زرداري چيو آهي ته پاڪستان ۽ عراق ڀائر ملڪ آهن جيڪي مضبوط تاريخي، ثقافتي ۽ مذهبي رشتن ۾ ڳنڍيل آهن، ٻنهي طرف هڪ ٻئي جي لاءِ بي پناهه نيڪ خواهشون موجود آهن، گڏيل منصوبن ۽ تعاون جي ذريعي پنهنجي ڀائراڻن لاڳاپن کي مستحڪم ڪرڻ جو هي بهترين وقت آهي. پرڏيهي آفيس موجب اهڙن خيالن جو اظهار هن عراق جي دوري دوران بغداد ۾ پاڪستاني ۽ عراقي واپاري برادري جي نمائندن کي خطاب ڪندي ڪيو. هن چيو ته صدر، وزيراعظم ۽ عراقي هم منصب سان ڳالهه ٻولهه دوران اسان ٻطرفي واپار ۽ سيڙپڪاري کي وڌائڻ، بنيادي ڍانچي جي نئين سر تعمير ۾ عراق سان تعاون ۽ پاڻي جي انتظام ۽ زراعت ۾ مهارت جي حصيداري سان مختلف شعبن ۾ تعاون کي وڌائڻ تي خيالن جي ڏي وٺ ڪئي. پرڏيهي وزير چيو ته اسان تعاون جون نيون راهون ڳولڻ جو عزم ڪيو آهي جنهن ۾ ڪنيڪٽيويٽي، بندرگاهن جي رابطي ۽ دفاعي پيداوار جي شعبن ۾ تعاون شامل آهي، ٻنهي ملڪن جي ڪاروباري برادري جي سهولت لاءِ اسان واپارين ۽ سيڙپڪارن جي لاءِ ويزا جي لچڪدار نظام ۽ ڪاروباري وفدن جي مٽاسٽا تي خيالن جي ڏي وٺ ڪئي. هن چيو ته پاڪستان ڪاروبار ڪرڻ ۾ آساني جي پنهنجي قدمن جي هڪ حصي طور پاڪستان ايندڙ غيرملڪي سيڙپڪارن جي لاءِ ويزا جي سهولت ۽ ڊگهي مدي جا جا ويزا جاري ڪرڻ جي لاءِ اڳ ۾ ئي انتظام ڪيا آهن. بلاول ڀٽو زرداري چيو ته پاڪستان ۽ عراق ٻن مفاهمتي ياداشتن تي صحيحون ڪيون آهن جن جو مقصد ثقافتي تعاون کي وڌيڪ فروغ ڏيڻ ۽ سفارتي ۽ سرڪاري پاسپورٽ هولڊرز جي لاءِ ويزا ڇوٽ جي سهولت ۾ توسيع ڪرڻ آهي. هن چيو ته اهي قدم واپار ۽ سيڙپڪاري جي فروغ لاءِ ماڻهن جي وچ ۾ رابطن ۽ اعليٰ سطح جي مٽاسٽا کي ڪافي حد تائين فروغ ڏيندا. پرڏيهي وزير چيو ته زائرين بابت مفاهمت جو مقصد زائرين جي مقدس جاين جي زيارت جي لاءِ قانوني چرپر کي آسان بڻائڻ آهي. هن چيو ته اها ڳالهه خوشي جوڳي آهي ته عراق نجف ۾ قونصلخانو کولڻ جي اسان جي درخواست تي اتفاق ڪيو آهي، اها مثبت اڳڀرائي ٻطرفن لاڳاپن جي رفتار کي وڌيڪ بلندين تائين وٺي ونيدي. هن ان يقين جو اظهار ڪيو ته ٻنهي طرفن جي ڪاروباري برادريون انهن انتظامن مان فائدو کڻنديون جيڪي اسان جي ڀائراڻن ۽ تاريخي لاڳاپن موجب واپار کي وڌائڻ ۾ مددگار ثابت ٿينديون. پرڏيهي وزير بلاول ڀٽو زرداري چيو ته اسان پنهنجي ڪاروباري برادري کي سهولت فراهم ڪرڻ ۽ عراق مان پاڪستان کي رقم جي منتقلي جي سلسلي ۾ ايندڙ رڪاوٽن کي ختم ڪرڻ جي لاءِ پڻ ڳالهه ٻولهه ڪري رهيا آهيون. هن چيو ته موجوده ٻطرفو واپار ٻنهي ملڪن جي وچ ۾ وسيع امڪانن موجب نه آهي، پاڪستان جي سنگل ڪنٽري نمائش مارچ 2022ع ۾ بغداد ۾ ٿي جنهن ۾ 20 ملين ڊالر جا سودا ٿيا، اهو ٻنهي ملڪن جي وچ ۾ واپاري صلاحيت کي ظاهر ڪري ٿو، پاڪستان عراق بزنس فورم ٻنهي طرفن جي ممڪن سيڙپڪارن ۽ واپاري حصيدارن جي وچ ۾ جي ٽو جي رابطن ۽ ڪاروباري نيٽ ورڪنگ جي لاءِ هڪ جهڙا موقعا فراهم ڪندو. هن چيو ته آءِ ٽي، فوڊ سيڪيورٽي، توانائي، تعميرات ۽ دوائن سميت 5 ترجيحي شعبن ۾ تعاون ۽ گڏيل سيڙپڪاري کي وڌائڻ تي ڌيان مرڪوز ڪن. پرڏيهي وزير چيو ته سيڙپڪاري ۽ منصوبن ۾ اسان پاڪستاني هنرمند ۽ نيم هنرمند انساني وسيلن کي استعمال ڪرڻ تي زور ڏينداسين. هن چيو ته مون کي ان شاندار تقريب ۾ فيڊريشن آف پاڪستان چيمبر آف ڪامرس ۽ عراقي واپارين جي تنظيم جي وچ ۾ مفاهمت جي ياداشت تي صحيحون ڏسي خوشي ٿي آهي، ٻنهي ملڪن جي وچ ۾ ٻطرفي واپار ۽ سيڙپڪاري جي تعاون کي وڌيڪ وڌائڻ جي لاءِ ان رفتار کي اڳتي وڌائڻ جي ضرورت آهي. هن ان موقعي تي پاڪستان عراق بزنس ڪائونسل قائم ڪرڻ جي تجويز ڏيندي چيو ته ان ۾ چيمبرز آف ڪامرس ۽ ٻنهي ملڪن جا اهم ڪاروباري نمائندا شامل ٿين، ان جي ذريعي اسان ٻنهي ملڪن جي وچ ۾ واپار ۽سيڙپڪاري کي وڌائڻ جي لاءِ پروگرامن، پاليسي تجويزن، روڊ ميپ ۽ خصوصي قدمن تي عمل ڪري سگهون ٿا. بلاول ڀٽو زرداري چيو ته اقتصادي سفارتڪاري اسان جي پرڏيهي پاليسي جو مرڪز آهي، اسان گڏيل فائديمند اقتصادي لاڳاپا قائم ڪرڻ چاهيون ٿا. هن چيو ته اسان جي حصيداري جي قيادت ٻنهي طرفن جي متحرڪ ڪاروباري برادري ڪري جيڪا ٻنهي ملڪن جي خوشحالي ۽ ترقي جي راهه هموار ڪري.
