اسلام آباد – 15 – ڊسمبر (اي پي پي) نگران وزيراعظم انوارالحق ڪاڪڙ ڪشميري عوام کي يقين ڏياريو آهي ته پوري پاڪستاني قوم انهن جي خودمختياري جي حق لاءِ آزادي جي جدوجهد ۾ انهن سان گڏ بيٺل آهي، ڪشميرين جي شموليت کانسواءِ هڪطرفي ڀارتي قدمن سان ان جي حيثيت ۾ ڪو فرق نه ٿو پوي، ڀارت کي شرمندگي کي منهن ڏيڻو پوندو. اهڙن خيالن جو اظهار هن اي جي ڪي ٽي وي کي خصوصي انٽرويو ڏيندي ڪيو. نگران وزيراعظم انوارالحق ڪاڪڙ چيو ته هن آزاد ڪشمير جي قانونساز اسيمبلي کي پنهنجي خطاب ۾ ڪشمير تڪرار بابت پاڪستان جي موقف جي ترجماني ۽ ورجاءُ ڪيو. هن چيو ته بزرگ حريت اڳواڻ سيد علي گيلاني سميت حريت قيادت آزادي جي جدوجهد جو هر اول دستو آهي، ڪشميري شهيدن جو اسان تي قرض آهي، ڪشمير کانسواءِ پاڪستان جو تصور ممڪن نه آهي، ڪشميرين کي يقين ڏياريان ٿو ته ڪلهو ڪلهي سان ملائي خودمختياري جي حق لاءِ انهن جي جدوجهد ۾ گڏ بيٺل آهيون. هن چيو ته ڪشمير عالمي سطح تي مڃيل تڪراري علائقو آهي ۽ گڏيل قومن جي سلامتي ڪائونسل جي ايجنڊا تي غيرحل شده موجود آهي، گڏيل قومن جي قراردادن موجب ان جو واحد حل ريفرنڊم آهي. هن چيو ته ڪشميرين جي شموليت کانسواءِ هڪطرفي ڀارتي قدمن سان ان جي حيثيت ۾ ڪو فرق نه ٿو پوي، ڀارت کي شرمندگي کي منهن ڏيڻو پوندو. هن چيو ته پاڪستان ڪشمير مسئلو سدائين هر فورم تي اجاگر ڪيو ۽ ڪندو رهندو، مير واعظ سميت حريت اڳواڻن جو ڪردار ڪشميرين جي آزادي جي جدوجهد ۾ ساراهه جوڳو آهي، حريت قيادت جي خلاف ڀارتي ظلمن جي باوجود ڪشميرين جي آزادي جي جدوجهد جاري رهندي ۽ وڌيڪ مستحڪم ٿيندي. نگران وزيراعظم چيو ته آزاد ڪشمير حڪومت سان گڏجي ڪنٽرول لائين جي ويجهو رهندڙ ڪشميرين جي مسئلن جي حل لاءِ قدم کڻنداسين. هن چيو ته ڪسميري قيادت سان مشاورتي ملاقات ٿي ۽ ڪشمير مسئلي کي اجاگر ڪرڻ جي لاءِ حڪمت عملي تي تفصيلي مشاورت ٿي، حريت قيادت ۽ ڪشمير جي چونڊيل نمائندن جي مشاورت سان قدم کڻنداسين، وڌيڪ طاقت سان ڪشمير مسئلو هر عالمي فورم تي اٿاريو ويندو. هن چيو ته تڪميل پاڪستان حاصل ڪرڻ ۾ ڪشميرين جو موثر ڪردار آهي، اهي قومي فرض جي لاءِ اڳتي وڌي پنهنجو ڪردار ادا ڪن، اسان ڪشميرين جي آزادي جي جدوجهد کي منطقي انجام تائين پهچائي سک جو ساهه کڻنداسين، ڀارتي ظلمن جي باوجود والاريل ڪشمير جي عوام جا حوصلا بلند آهن، انهن جي آزادي جي جدوجهد کي سنهري لفظن ۾ لکيو ويندو، پوري پاڪستاني قوم انهن سان گڏ بيٺل آهي.
