رياض -28 اپريل (اي پي پي) وزيراعظم محمد شهباز شريف صحت جي شعبي ۾ عالمي عدم برابري کي اوليت ۽ سڀ کان اهم مسئلو قرار ڏيندي چيو آهي، ته صحت جي ميدان ۾ عالمي سطح تي ترقي يافته ۽ اسرندڙ ملڪ ۽ گهٽ ترقي يافته ملڪن وچ ۾ وڌندڙ فرق کي ختم ڪرڻ جي سخت ضرورت آهي، پاڪستان ماحولياتي تبديلي سبب متاثر ملڪن ۾ سڀ کان مٿي آهي، حڪومت ملڪ مان پوليو جي مڪمل خاتمي لاءِ پرعزم آهي. وزيراعظم آفيس جي ميڊيا ونگ مان جاري بيان مطابق وزيراعظم اهڙو اظهار هن عالمي اقتصادي فورم جي خاص اجلاس جي موقعي تي صحت جي شعبي ۾ فرق جي خاتمي جي موضوع تي ڳالهائيندي ڪيو. بحث کي صحت جي عالمي اداري جي ڊائريڪٽر جنرل ٽيڊ روس ايڊهينم گبرائسس، ڪنگ سلمان، هيومنٽيرين ايڊ اينڊ رليف سينٽر جي سپروائيزر جنرل ڊاڪٽر عبدالله الربيعه ۽ بل اينڊ ميلنڊا گيٽس فائونڊيشن جي نمائندي انتيا زيدي پڻ خطاب ڪيو. وزيراعظم محمد شهباز شريف پنهنجي خطاب ۾ چيو ته دنيا ۾ صحت جي شعبي ۾ عالمي عدم برابري وڏو مسئلو آهي، ڪووڊ-19 وبائي مرض صحت جي سهولتن جي فراهمي ۽ ويڪسين جي ورهاست جي معاملي ۾ گلوب سائوٿ ۽ گلوب نارٿ وچ ۾ وڏي پئماني تي موجود خال کي بي نقاب ڪيو.هن چيو ته 2003ع ۾ جڏهن هو سعودي عرب ۾ جلاوطني جي زندگي گذاري رهيو هو، تڏهن ان کي ڪينسر جو مرض ٿيو ۽ ان جي علاج لاءِ نيويارڪ ويو ته اتي هزارين ڊالر علاج تي لڳا، تڏهن هن سوچيو ته ايترو مهانگو علاج برداشت ڪرڻ جي ماڻهو صلاحيت نه رکندا هئا، خوشقسمتي سان جڏهن هو صحتياب ٿي پاڪستان آيو ۽ پنجاب جي وڏ وزارت جي منصب تي فائز ٿيو ته ان وقت پنجاب ۾ ڪڊني ڪينسر ۽ جگر جي مرضن جي علاج لاءِ ادارا ٺاهڻ تي ڪم شروع ڪيو. پنهنجي محدود وسيلن ۾ رهندي، پنهنجي عوام کي صحت جي فراهمي جو عزم ڪيو، وڏي وزير طور پنهنجي صوبي ۾ هيپاٽائيٽس جي مرض جي علاج جون سهولتون پنجاب جي ڏورانهن علائقن ۾ به فراهم ڪيون. سٽي اسڪين جهڙيون سهولتون ڏنيون، لاهور ۾ ڏکڻ ايشيا جي بهترين ڪڊني اسپتال ٺاهي، چين ۽ ڀارت وڃي ايترو مهانگو علاج ڪرائيندڙن کي هتي اها سهولت ڏني. هن چيو ته ماحولياتي تبديلي عالمي منظرنامي کي تبديل ڪري ڇڏيو آهي، پاڪستان جو شمار ماحولياتي تبديلي سبب متاثر ملڪن ۾ سڀني کان مٿي آهي، انهي ڪري ماحولياتي آلودگي ۾ ان جو حصو نه هئڻ جي برابر آهي ۽ ان جي ريڊ لسٽ ۾ آهي. هن چيو ته 2022ع ۾ ماحولياتي تبديلين سبب پاڪستان ۾ شديد ٻوڏ آئي جنهن زراعت ۽ انفراسٽرڪچر کي تباهه ڪيو. 100 ارب رپين کان وڌيڪ بحالي تي خرچ ٿيا، ان وقت پرڏيهي امداد جي ضرورت هئي جڏهن ته مهانگا قرض مليا، ڇا پٺتي پيل ملڪ اهڙي صورتحال کي منهن ڏيڻ جي اهليت رکن ٿا؟ هن چيو ته 2011ع ۾ پنجاب ۾ ڊينگي جو مرض سامهون آيو ته سڄي دنيا مان ماهر گڏ ڪري ۽ ڏينهن رات هڪ ڪري ان مان نجات حاصل ڪئي ۽ ماڻهن جون زندگيون بچايون، هن چيو ته ڪنگ سلمان فائونڊيشن صحت جي شعبي ۾ نمايان خدمتون سرانجام ڏئي رهي آهي. هن خادم الحرمين الشريفين، سعودي فرمانروا سلمان بن عبدالعزيز ۽ سعودي ولي عهد محمد بن سلمان جي صحت جي شعبي جي حوالي سان قدمن جي خاص تعريف ڪئي. هن چيو ته سعودي فرمانروا ۽ سعودي ولي عهد پنهنجي قدمن سان ڏکويل انسانيت جي مدد ڪري رهيا آهن. ان موقعي تي وزيراعظم بل گيٽس فائونديشن جي پاڪستان ۾ پوليو جي خاتمي لاءِ قدمن تي شرڪت ڪندڙن ۾ موجود بل گيٽس کي خاص خراج تحسين پيش ڪيو. هن چيو ته اهڙي موقعي تي جيڪڏهن مان بل گيٽس جي پاڪستان ۾ پوليو جي خاتمي لاءِ قدمن جو ذڪر نه ڪيان ته اها منصفاڻي ڳالهه نه هوندي. هن چيو ته سال 2022ع ۾ جڏهن پاڪستان ۾ وڏي پئماني تي ٻوڏ تباهي ڪئي ته بل گيٽس فائونڊيشن ۽ پاڪستان حڪومت پنهنجون ڪوششون جاري رکيون ۽ ٻارن کي پوليو کان بچاءَ جا ڦڙا فراهم ڪيا. هن چيو ته مون کي پوري اميد آهي ته جيڪڏهن اسان اهڙي طرح پنهنجون ڪوششون جاري رکنداسين ته جلد پاڪستان مان پوليو جو خاتمو اچي ويندو. ان موقعي تي صحت جي عالمي اداري جي ڊائريڪٽر جنرل پنهنجي خطاب ۾ چيو ته پائيدار ترقياتي هدف حاصل ڪرڻ لاءِ اجتماعي ڪوششن جي ضرورت آهي. ٻار ۽ ماءُ جي فوتگين جي شرح تي ڳڻتي جو اظهار ڪندي هن چيو ته 54 ملڪ هن وقت به ايس ڊي جيز هدف حاصل ڪرڻ ۾ تمام پٺتي اهن. جڏهن ته 4 ارب 90 ڪروڙ ماڻهن کي بنيادي سهولتون ميسر ناهن. ٻين شرڪت ڪندڙن چيو ته دنيا ۾ تڪرار وڌي رهيا آهن جيڪي صحت جي شعبي جي ضرورتن تي اثر انداز ٿي رهيا آهن.
