جنیوا۔10جنوری(اے پی پی) وزیر اعظم محمد شہبازشریف ریزیلیئنٹ پاکستان کانفرنس دی کامیابی تے اظہار تشکر کریندے ہوئیں آکھیے جو 9 ارب ڈالر توں ودھ رقم سیلاب متاثرین دی بحالی اتے نویں سروں تعمیر کیتے غیبی مدد توں گھٹ کائنی ،اللہ دی مدد اتے عوامی تعاون توں پاکستان دے پاسے ودھدی ہر مشکل دا جرات ودانائی نال مقابلہ کریسن ۔منڳل کوں وزیراعظم آفس دے میڈیا ونگ توں جاری بیان موجب وزیراعظم شہبازشریف آکھیے اللہ تعالی دا شکراے جئیں پاکستان تے مصیبت زدہ عوام کیتے بہتری دا رستہ کھولیے۔ انہاں آکھیے 9 ارب ڈالر توں ودھ رقم سیلاب متاثرین اتے پاکستان دی بحالی اچ غیبی مدد توں گھٹ کائنی ۔ اتنی وݙی رقم دا پاکستان کوں ملݨ موجودہ اتحادی حکومت تے دنیا دا اعتماد اے۔ اے اکائیاں تے 22 کروڑ عوام دے اتحاد دی کامیابی اے، اے پاکستان دے ٹیم ورک دی کامیابی اے ۔ وزیراعظم آکھیے وفاق تے اکائیاں دے ایں ٹیم ورک تے قومی جذبے توں پاکستان اتے عوام کوں اوکھ دی دلدل توں کڈھیسوں ۔ ایں امانت کوں دیانتداری، شفافیت اتے تھرڈ پارٹی آڈٹ توں حقداراں تئیں پڄیسوں ۔ سارے عالمی پارٹنرز بالخصوص سیکریٹری جنرل اقوام متحدہ دا دلوں شکرگزار ہاں۔ ہمیشہ مہربان بھرا سعودی عرب،عظیم دوست چین، بھرا ملک ترکیہ دی قیادت دے مشکور ہیسے ۔ انہاں آکھیے ولی عہد اتے سعودی عرب دے وزیراعظم عزت مآب شہزادہ محمد بن سلمان دا خصوصی شکریہ ادا کرینداں جنہاں کانفرنس دے علاوہ پاکستان دی مالی معاونت دا وݙے دل نال بھرپی آلا قدم چاتے ۔ پاکستان دے عظیم بھرا ملک متحدہ عرب امارات اتے قطر دی قیادت دا خاص طور تے شکریہ ادا کریندوں ۔ یورپی یونین، امریکا ، جرمنی، جاپان، فرانس سودھے کانفرنس اچ شریک سارے ملکاں دی قیادت دا شکریہ ادا کریندوں ۔عالمی مالیاتی اداریں دا شکریہ جنہاں 3 کروڑ 30 لکھ سیلاب متاثرین دی اوکھ کوں سمجھیا ۔ وزیراعظم آکھیے اسلامی ترقیاتی بینک ، ورلڈبینک، اے ڈی بی، یوایس ایڈ ، ڈیفیڈ اتے ٻئے اداریں دا شکریہ ادا کرینداں ۔ بلاول بھٹو زرداری دی قیادت اچ وزارت خارجہ کانفرنس دے مقاصد دے حصول اچ متحرک اتے قابل تحسین کردار ادا کیتے۔ وزیر خزانہ اسحاق ڈار کانفرنس کوں پاکستان کوں پیش آںدی مالی مشکلات بارے ݙساوݨ ، سیلاب متاثرین دی بحالی کیتے درکار وسائل دی فراہمی اتے عالمی مالیاتی اداریں کوں قائل کرݨ اچ اہم کردار ادا کیتے ۔ انہاں آکھیے احسن اقبال دے صوبیں دی مشاورت نال ہنگامی بنیاداں تے جامع دستاویز تیار کیتی جیں دی توجہ توں اے رقم پاکستان کوں ملݨ ممکن تھی سڳیا ، ایں دستاویز اچ ضیان تے بحالی کیتے مستقبل دا خاکہ ݙتا ڳئے ۔ احسن اقبال، شیری رحمن، سردار ایاز صادق، حنا ربانی کھر اتے مریم اورنگزیب کوں انہاں دیاں بہترین کاوشاں تے شاباش ݙینداں ۔ جنیوا کانفرنس دی کامیابی کیتے سارے متعلقہ وزارتاں تے محکمیں کوں وی شاباش ݙینداں ۔تساں ساریں’ٹیم پاکستان‘ بݨ تے پاکستان کیتے کامیابی ڳھدی، تساں ساریں تے فخر اے ۔الحمداللہ ، پاکستان اوکھ دے بھنورتوں نکلدا پئے ۔اللہ تعالی دی مدد اتے عوام دے تعاون نال پاکستان دے پاسے ودھدی ہر اوکھ دا جرات تے دانائی نال مقابلہ کریسوں۔
