اسلام آباد۔4اگست(اے پی پی) وفاقی وزیر داخلہ محسن نقوی یوم شہدائے پولیس تے شہدائے پولیس دی عظیم قربانیاں کوں خراج عقیدت پیش کیتے۔ یوم شہدائے پولیس دے موقع تے آپݨے پیغام اچ انہاں آکھیے اے ݙینھ بہادر پولیس اہلکاراں دی کݙاہیں نہ بھلائیاں ونجݨ آلیاں قربانیاں دی یاد ݙویندے جیڑھا پوری قوم دا ماݨ ہن ۔ وزیر داخلہ آکھیے جرم روکݨ اچ پولیس افسر تے اہلکار ہمیشہ اڳوں رہین ۔ انہاں امن و امان برقرار رکھݨ سانڳے سارے صوبیں اچ پولیس فورس دی مثالی خدمات دی تعریف کیتی ۔ انھاں دہشت گردی دے خلاف جنگ اچ پولیس افسراں تےنینگراں دیاں قربانیاں دا وی اعتراف کریندے آکھیے انہاں آپݨے قیمتی رت نال تاریخ لکھی اے ۔ انہاں آکھیے ایس ایس پی اشرف مارتھ، کیپٹن مبین اتے پولیس دے سارے شہداء ساݙے دل اچ ہمیشہ زندہ رہسن ۔ شہدائے پولیس دیاں قربانیاں انمول ہن جنہاں کوں کݙاہیں نی بھلایا ونڄ سڳدا ۔وفاقی وزیر داخلہ آکھیے یوم شہدائے پولیس دے موقع تے شہدا دے گھر آلیں نال اظہار یکجہتی کریندوں تے انھاں دے رلے کھڑوں ، شہدائے پولیس دے گھر آلیں دی فلاح و بہبود حکومت دی ذمہ واری اے۔وزیر داخلہ آکھیے سچی قوم ہمیشہ اپݨے شہدا کوں خراج تحسین پیش کریندی اے ۔ انہاں ایں ڳالھ تے زور ݙتے جو شہداء دی عزت و احترام تے کوئی سمجھوتہ نہ کیتا ویسی
