اسلام آباد – 24 – آڪٽوبر (اي پي پي) نگران وزيراعظم انوارالحق ڪاڪڙ لاڳاپيل وزارتن کي ربيع جي فصل لاءِ ڀاڻ جي بنا رڪاوٽ فراهمي جي لاءِ ٺوس حڪمت عملي پيش ڪرڻ جي هدايت ڪئي آهي. وزيراعظم آفيس جي ميڊيا ونگ پاران جاري بيان موجب نگران وزيراعظم جي صدارت ۾ ربيع جي فصل لاءِ يوريا جي فراهمي تي جائزه اجلاس ٿيو. ربيع جي فصل لاءِ آبادگارن کي وقت سر ۽ بنا رڪاوٽ ڀاڻ جي فراهمي يقيني بڻائي وڃي. نگران وزيراعظم چيو ته ڀاڻ جي وڏي اسٽاڪ جو به مناسب ۽ وقت سر بندوبست ڪيو وڃي. ضلعي انتظاميا ڀاڻ جي قيمتن تي گهري نظر رکي. اجلاس کي ملڪ ۾ ڀاڻ جي تازي پيداوار ۽ گهربل متوقع گهرج بابت ٻڌايو ويو. اجلاس کي ڀاڻ جي بنا رڪاوٽ فراهمي جي لاءِ اقتصادي رابطا ڪميٽي جي فيصلن بابت پڻ آگاهه ڪيو ويو. نگران وزيراعظم لاڳاپيل وزارتن کي ربيع جي فصل لاءِ ڀاڻ جي بنا رڪاوٽ فراهمي جي لاءِ ٺوس حڪمت عملي ٺاهي پيش ڪرڻ جي هدايت ڪئي. اجلاس کي ڀاڻ جي پيداوار جي خام مال جي قيمتن، ڀاڻ جي موجوده قيمت، ڀاڻ فيڪٽرين کي گئس جي فراهمي ۽ طلب بابت تفصيلي طور تي آگاهه ڪيو ويو. اجلاس ۾ نگران وفاقي وزير گوهر اعجاز، ڪوثر عبدالله ملڪ، محمد علي، نگران وزيراعظم جي صلاحڪار احد خان چيما ۽ لاڳاپيل اعليٰ عملدارن شرڪت ڪئي.
